وحدة من اكتر الوصفات المفضلة عندي. طيبة كتير وباردة بتخلي الواحد يستمتع فيها كتير خصوصا أيام الصيف. طرية ومحشية بالقشطة اللي كمان طرية ومحلاية بالقطر، عنجد من اروع وصفات الحلو العربي
مش صعبة ابدا، بس الحقوا الوصفة زي ما هي و رح تزبط معكم. جربوها رح كتير تعجبكم
حلو الجبنة قبل بيوم، بنقعها بمي حلوة وتركها بالثلاجة لتاني يوم
اعملوا القطر (الوصفة بالرابط هادا) بعدين ادهنوا صنية مستطيلة ب١/٢ كوب قطر، وحطوها على جنب
حمصوا السميد بالزبدة لدقيقة وبعدين زيدوا عليهم القمح المطحون. استمروا بالتحميص مع التحريك لمدة ٣ دقائق. بعدين زيدوا كوب قطر ومعلقة ماء الزهر واخلطوا الكل مع بعض منيح
ضيفوا الجبنة المحلاية عليهم وحركوا الكل بقوة حتى اتدوب الجبنة ويمتزج الخليط ويصير متجانس
مدوا عجينة الجبنة في الصنية فوق القطر لتغطي كل الصنية. بعدين اتركوها حتى تبرد
بعد ما تبرد، قطعوها ل ١٢ قطعة متساوية الحجم، وحطوا ٢ ملعقة كبيرة قشطة على كل قطعة ولفوا القطعة رول باحكام
حطوا الرولز بصحن التقديم ورشوهم يالفستق وحطوا شوية مربى الورد فوق كل رول. بعدين صبوا شوية قطر فوقه. وقدموهم باردين مع الشاي
🙂 لشوية تغيير بالوصفة المعتادة، ممكن استعمال البوظة (جربوا بوظة بطعم المستكة) بدل القشطة، ولفوهم بسرعة وفرزوهم شوي قبل التقديم. بتصير تشبه حلو الموشي الياباني و كتير طيبة
