هالأيام في كتير وصفات بسطيلة وكتير بيستعملوا حشوات مختلفة من دجاج لسمك وثمار البحر وحتى لحم السمان والديك الرومي (بسطيلة الديك الرومي طبق كتير مبهر لما يتقدم بمناسبة متل الكريسماس أو عيد الفصح).
حتى هاي الأيام البسطيلة عم تنعمل كحلو كمان (هاي الوصفة لحلو البسطيلة عهادا اللينك). لكن البسطيلة التقليدية والأكتر شهرة بتقديمها في المناسبات الخاصة هي بسطيلة الحمام واللي ابتشتهر فيها مدينة فاس. حتى إنه إسم هاي البسطيلة أخد إسم المكان وبتتسمى بالبسطيلة الفاسية. أنا حبيت أحطلكم هاي الوصفة التقليدية لأنه مش الكل بعرفها ولأنها مش عادي شو طيبة. بس كمان لأني عندي حب خاص لكل الوصفات القديمة واللي تقريبا منسية وكل الوصفات التقليدية. لكن إزا بتفضلوا البسطيلة مع الدجاج، السمان إو الديك الرومي فهمة كلهم بتبعوا نفس الوصفة بس اللحم بختلف، فإعملوها باللحم اللي بتفضلوا. بس السمك وثمار البحر إلهم وصفة تانية مختلفة وهادا حسب تعليمات الستات اللي قابلتهم بالمغرب. جربوها ورح تعجبكم أنا متأكدة 🙂 ـ
إزا ما لقيتوا ورق بسطيلة بالسوق جربوا الوصفة اللي على هادا اللينك، كتير سهلة ونتائجها عظيمة. ـ
